صديقة الطفوله

صديقة الطفوله إهي إللي ينقال لها إختي ما ينقالها الصديقه ..

-كلنا عندنا هذيك الصديقه إللي كل البلاوي إللي سويتيها بحياتج معاها .. اهي إللي كل ما قلتي سالفه حق أحد  تكملها عشان تنرفزج و بعدين تنطرج تتنرفزين و تضغطج .. اهي إللي عارفتلج، تعرف شلون تساحلج تعرف شلون تغير مزاجج بدقيقه .. اهي إللي تدل بيتكم بس مو حافظه العنوان .. اهي إللي حافظتج عدل من نظرتج تعرف شفيج .. اهي اللي تدق عليج بنص الليل عشان تقولج سالفه و إنتي دايخه بعدين تشتطين معاها و تكملون سوالف لين تطلع الشمس، و لي ييتي تسكرينه تقولج أخيراً بفتك من حنتج على غشمره بدال ما تقولج مع السلامه .. الصديقه الحقيقيه إهي إللي أهلج يعدونها وحده منهم و فيهم .. إهي اللي امج لا سوتّ المجبوس ولا البرياني إللي تحبه تقولج إتصلي على فلانه خل تيي مسويتلها ذيك الأكله إللي تحبها .. إهي إللي لازم لازم ما يمر يوم بدون ما تشوفينها .. إهي إللي لازم كل طلعه تطلعينها تكون فيها معاج .. إهي الوحيده إللي من بين صديقاتج إللي شايفتج بهلاقتج و بكشتج .. إهي إللي كل طلعة شاليه تكون موجوده .. إهي إللي نص ثيابج بكبتها و نص ثيابها بكبتج .. إهي إللي 24 ساعه تكون معاج عالخط .. إهي إللي تدري أي نوع شامبو تستخدمين .. إهي إللي تعرفج أكثر منج .. إهي إللي كل ما بتسوين شي تروحين تشاورينها .. إهي إللي تقولين لها لو أموت شتسوي؟ تقعد تضحك تقولج من صجك؟ بعيّد راح أسوي عرس .. إهي إللي فاهمتج .. إهي إللي تنطبق عليها أول مقطع من إغنية يا فاهمني .. إهي إللي لا قلتي لها جظمثكيتهف؟ تقولج يلا فووقه .. إهي إللي فجأه تدق عليج تقولج طلعيلي برّه يايبتلج بلعه .. إهي الإنسانه الوحيده إللي على وجه الأرض لا شفتيها ما تسلمين عليها .. إهي إللي لا تضايقتي تتضايق معاج .. إهي إللي لا إستانستي تتستانس معاج لو شنو كانت ظروفها .. إهي الوحيده إللي تقدرين تحشين بالناس معاها بالنظرات حتى لو المحشوش به بينكم .. إهي إللي كل صورّج معاها، و إذا مو معاها تكون إهي إللي مصورتج .. إهي إللي لي زفّتي بالإمتحان عادي جداً إنها تعطيج طراق يفر راسج عشان تشدين حيلج بالإمتحانات اليايه .. إهي إللي كل شي ممنوع تسوينه من دون لا تشاورينها .. إهي إللي على طول تهددج بصورّج .. إهي إللي تتناجرين معاها خمس دقايق إنتو متصالحين .. إهي إللي ما تقدرين تعيشين بدونها .. إهي إللي إنتي بدونها ضايعه .. إهي أغلى شي بحياتج .. إهي إللي تخافين تخسرينها .. إهي إللي لا سافرت و ما شغلت الخدمه تحسن مادري شلون .. إهي إللي أيام الإبتدائي لا طقوج يت و دافعت عنج .. إهي إللي لا صار ما عندج فلوس تدفعلج .. إهي إللي حافظه مقاس جوتيج و إنتو بكرامه .. إهي إللي إنتي حاطه صورتج إنتي معاها خلفية تلفونج .. إهي إللي جد حياتج ما تسوى بدونها .. إهي إللي لا صرتوا بين ناس طالعتوا بعض و ضحكتوا و خليتوا العموم يشك بنفسك .. إهي إللي لا شافوكم الناس عبالهم إنكم حبايب .. 

أكيد يوم قريتي طرتّ على بالج هذيك الصديقه صح؟ و قعدتي تتذكرين أشياء سويتوها مع بعض و ضحكتي .. الله يخلي كل صديقه لصديقتها ولا يحرمكم من بعض♡♡ 

 *إختكم/قبندي.